Cinema


அங்கமாலி டைரீஸ், ஆமென், டபுள் பேரல் போன்ற படைப்புகள் மூலம் மலையாள சினிமாவில் தனித் தடத்தில் பயணித்துக்கொண்டிருப்பவர் லிஜோ ஜோஸ் பெல்லிசேரி.  தனது அடுத்த படைப்புக்கு ஜல்லிக்கட்டு என பெயரிட்டுள்ளார். இதற்கான போஸ்டரை தனது ஃபேஸ்புக் பக்கத்தில் வெளியிட்டுள்ளார். இந்தப் படத்துக்கான கதையை ஹரீஸ் மற்றும் ஆர்.ஜெயக்குமார் எழுதியுள்ளனர். 

கார்த்திக் நரேன் இயக்கியிருக்கும் 'நரகாசூரன்' படத்துக்கு யு/ஏ சான்றிதழ் கிடைத்துள்ளது. இதில் அரவிந்த் சாமி, ஸ்ரேயா, சந்தீப் கிஷன் ஆகியோர் நடித்துள்ளனர். அடுத்ததாகச் சிம்புவை இயக்க இருக்கிறாராம் கார்த்திக் நரேன்.   

மிஷ்கின், சுசீந்திரன், விக்ராந்த் நடிப்பில் உருவாகி இருக்கும் ‘சுட்டுப்பிடிக்க உத்தரவு’ படத்தின்  ஃபர்ஸ்ட் லுக் போஸ்டர் வெளியாகியுள்ளது. இத்திரைப்படத்தில் இயக்குநர் சுசீந்திரன் நடிகராக அறிமுகமாகிறார் என்பதாலும், மிஷ்கின் - விக்ராந்த் என்ற வித்தியாசமான காம்போ என்பதாலும்  படத்தின் மீதான எதிர்பார்ப்பு அதிகரித்துள்ளது.  

இயக்குநர் கார்த்திக் சுப்புராஜ், தற்போது ரஜினியை வைத்து படம் இயக்கி வருகிறார். இந்நிலையில்  வெப் சீரிஸ் தயாரிப்பிலும் அவர் இறங்கியுள்ளார். இவர் தயாரித்துள்ள `கள்ளச்சிரிப்பு' வெப் சீரிஸின் டிரெய்லர் வெளியாகியுள்ளது. குடும்பப் பிரச்னைகளை மையமாக வைத்து கள்ளச்சிரிப்பு வெப் சீரிஸ் எடுக்கப்பட்டுள்ளது.

உலகளவில் அதிகமாகச் சம்பாதிக்கும் பிரபலங்கள் பட்டியலை ஃபோர்ப்ஸ் இதழ் வெளியிட்டுள்ளது. அதில் பிரபல பாலிவுட் நடிகர்கள் சல்மான் கான் மற்றும் அக்‌ஷய் குமார் இடம்பிடித்துள்ளனர். 4.05 கோடி டாலருடன் அக்‌ஷய் 76 வது இடமும், 3.77 கோடி டாலருடன் சல்மான் கான் 82 வது இடமும் பிடித்துள்ளனர். இந்தப் பட்டியலில் ஷாரூக் கான் இடம்பெறவில்லை.

தெலுங்கு நடிகர் பாலகிருஷ்ணா தற்போது அவரின் தந்தையின் பயோபிக் ஆன `என்.டி.ஆர்’ படத்தில் நடித்து வருகிறார். இதில் அவருக்கு ஜோடியாக வித்யாபாலன் நடிக்கிறார். படப்பிடிப்பில் கலந்துகொள்ள வந்த வித்யாபாலனுக்கு பாலகிருஷ்ணா புடவை பரிசளித்து கௌரவப்படுத்தியுள்ளார். இந்தப் புகைப்படம் தற்போது வைராலாகி வருகிறது.

ஆண்டனி படத்துக்குப் பிறகு, `திமிரு புடிச்சவன்' படத்தில் நடித்து வருகிறார் நடிகர் விஜய் ஆண்டனி. இதில் அவர் முதல் முறையாகப் போலீஸ் கதாபாத்திரத்தில் நடித்து வருகிறார். விஜய் ஆண்டனிக்கு ஜோடியாக நிவேதா பெத்துராஜ் நடிக்க கணேஷா என்பவர் இயக்குகிறார். இப்படத்தின் மோஷன் போஸ்டர் தற்போது வெளியாகியுள்ளது. 

அறிமுக இயக்குநர் நெல்சன் இயக்கத்தில் நயன்தாரா நடித்து வரும் படம் கோலமாவு கோகிலா. இப்படத்துக்கு அனிருத் இசையமைத்துள்ளார். இப்படத்தில் இடம்பெற்றுள்ள `கல்யாண வயசு' வெளியாகி ஏற்கெனவே ஹிட் அடித்த நிலையில் தற்போது மற்றொரு சிங்கிள் டிராக் வெளியிடப்பட்டுள்ளது. இதில் பிஜிலி ரமேஷ் உள்ளிட்டோர் நடித்துள்ளனர்.

துல்கர் சல்மானின் 25வது படமாக உருவாகி வரும் `கண்ணும் கண்ணும் கொள்ளையடித்தால்' படத்தை தேசிங் பெரியசாமி இயக்கி வருகிறார். இதில் துல்கருக்கு ஜோடியாக ரீத்து வர்மா இணைந்துள்ளார். தற்போது இப்படத்துக்கு இசையமைக்க பிரபல மியூசிக் பேண்டான `மசாலா காபி’ ஒப்பந்தம் செய்யப்பட்டுள்ளது. அதற்கான அதிகாரபூர்வ அறிவிப்பு வெளியாகியுள்ளது. 

கார்த்திக் சுப்புராஜ் இயக்கத்தில் ரஜினிகாந்த் நடிக்கும் படத்தில் பாலிவுட் ஸ்டார் நவாஸுதீன் சித்திக் இணைந்துள்ளார். இதேபோல் நடிகை சிம்ரனும் இப்படத்தில் நடிக்கவுள்ளார். இதைத் தயாரிப்பு நிறுவனமான சன் பிக்சர்ஸ் அதிகாரபூர்வமாக அறிவித்துள்ளது. ஏற்கெனவே, காலா படத்தில் பாலிவுட் நடிகர் நானா படேகர் நடித்தது குறிப்பிடத்தக்கது.

`மாரி 2'. 'வடசென்னை' படத்தைத் தொடர்ந்து, கௌதம் வாசுதேவ் மேனன் இயக்கத்தில் இறுதிக்கட்ட படப்பிடிப்பிலிருக்கும் 'எனை நோக்கிப் பாயும் தோட்டா' படத்தில் நடித்து வருகிறார் தனுஷ். இந்தப் படங்களை முடித்துக்கொடுத்துவிட்டு மீண்டும் இயக்குநர் அவதாரத்தை ஏற்கவுள்ளார் என தகவல் வெளியாகியுள்ளது.

`கடைக்குட்டி சிங்கம்' படம் வெளியானதையொட்டி நடிகர் கார்த்தி மற்றும் படக்குழுவினர் திருச்சி வந்து ரசிகர்களைச் சந்தித்தனர். அங்கு பேசிய நடிகர் கார்த்தி, `இப்போதும் கிராமத்துக்குச் சென்றால் மண்வெட்டி பிடித்து விவசாய வேலைகளைச் செய்கிறேன். விவசாயம் செய்ய நானும் நிலம் வாங்கி விட்டேன்' என்று தெரிவித்துள்ளார் உற்சாகமாக! 

மெர்சல் மூலம் விஜய்க்கு பெரிய ஹிட் கொடுத்த அட்லி, விஜய்யுடன் மூன்றாம் முறையாக இணையவுள்ளாராம். இப்படத்துக்கு ஏ.ஆர்.ரஹ்மானை இசையமைக்க வைக்க படக்குழு பேச்சுவார்த்தைகளை நடத்தவுள்ளதாகவும் அதிக பட்ஜெட் செலவில் மிகப் பிரமாண்டமாக இப்படம் தயாராகவுள்ளதாகவும் தெரிவிக்கப்படுகிறது.   

 

'குயின்'என்ற இந்திப் படத்தின் ரீமேக்கான 'பாரிஸ் பாரிஸ்' திரைப்படத்தில் காஜல் அகர்வால் நடித்து வருகிறார். இந்நிலையில், படத்தின் ஒரே ஒரு நாள் படப்பிடிப்பு மட்டும் விமானத்துக்குள் நடக்க இருப்பதாகவும், அதோடு படப்பிடிப்பு வேலை முடிவடைகிறது எனவும் படக்குழுவினர் கூறியுள்ளனர்.

கார்த்திக் சுப்புராஜ் இயக்கத்தில் ரஜினி நடிக்கும் படத்துக்கு இன்னும் பெயர் சூட்டப்படவில்லை. இத்திரைப்படத்தில் ரஜினிக்கு ஜோடியாக சிம்ரன் நடித்து வருவதாகத் தகவல் வெளியாகியுள்ளது. படப்பிடிப்பு  வேலைகள் டார்ஜ்லிங்கில் தொடங்கிவிட்டதாம். இந்தப் படத்தில் ரஜினிக்கு வில்லனாக விஜய் சேதுபதி நடிக்கவிருப்பது குறிப்பிடத்தக்கது. 

சென்னையில், பிரபல  டி.வி சீரியல் நடிகை பிரியங்கா, வீட்டில் தூக்குப்போட்டு தற்கொலை செய்துகொண்ட சம்பவம் பெரும் பரபரப்பை ஏற்படுத்தியுள்ளது. இவர் 'வம்சம்' டி.வி சீரியலில் நடித்துள்ளார். திருமணம் முடிந்து இதுநாள் வரை பிரியங்காவுக்கு குழந்தை இல்லாதது தற்கொலைக்குக் காரணமாக இருக்கலாம் என்று போலீஸார் கருதுகின்றனர்

ஜே.எஸ். நந்தினி இயக்கும் 'நிலா நிலா ஓடி வா' எனும் புதிய வெப் சீரியலில் சுனைனா நடிக்க உள்ளார். இதில் அவர்  `நிலா’ எனும் கதாப்பாத்திரத்தில் வாம்பயராக நடிக்க உள்ளாராம். இது வாம்பயரை அடிப்படையாய் கொண்ட ரொமான்டிக் -நகைச்சுவை தொடர் என இயக்குநர் தெரிவித்துள்ளார்.

கெளதம் இயக்கத்தில் தனுஷ் நடிக்கும் படம் 'என்னை நோக்கி பாயும் தோட்டா'. இப்படத்தில் சசிகுமார் முக்கிய வேடத்தில் நடிக்கிறார். இந்நிலையில் படத்தில் மூன்று இயக்குநர்கள் இணைத்துள்ளதாக ட்விட்டர் பக்கத்தில் குறிப்பிட்டுள்ளார் கெளதம். மேலும் படத்தின் புதிய லோகோ ஜூலை 20 ரிலீஸ் செய்யப்படும் எனவும் அறிவிக்கப்பட்டுள்ளது.

எனை நோக்கி பாயும் தோட்டா படத்தின் இறுதிக்கட்ட படப்பிடிப்பு சென்னையில் நடைபெற்றுவருகிறது. அதில், தனுஷின் அண்ணனாக சசிகுமார் நடிக்கவுள்ளார் என்ற செய்தி வெளியானது. இப்போது எடுத்துவரும் காட்சியில் அவருக்கான போர்ஷன்களும் அடங்கும். துருவ நட்சத்திரம் போஸ்ட் புரொட்க்ஷன் வேலைகளும் நடைபெறுவதால் கௌதம் சந்தோசத்தில் உள்ளார்.

 

 

கெளதம் மேனன் இயக்கத்தில் உருவாகி வரும் 'எனை நோக்கி பாயும் தோட்டா' படத்தின் இறுதிக்கட்ட படப்பிடிப்பு சென்னையில் விறுவிறுப்பாக நடந்து வருகிறது. இதில், தனுஷின் அண்ணனாக சசிகுமார் நடிக்க இருக்கிறார் என்ற செய்தி வெளியானது. இப்போது எடுத்து வரும் காட்சிகளில் அவருக்கான போர்ஷன்களும் அடங்கும். எனவே, இந்தப் படப்படிப்பில் கெளதம் மேனன், தனுஷ், சசிகுமார் ஆகிய மூன்று இயக்குநரும் உள்ளனர். இறுதிக்கட்ட படப்பிடிப்பின் பத்து நாட்களில் ஐந்து நாட்கள் சென்னையிலும் ஐந்து நாட்கள் மும்பையிலும் படப்பிடிப்பு நடத்த இருக்கிறார்கள். இப்படத்தின் 'மறுவார்த்தை', 'விசிறி' ஆகிய பாடல்களுக்கு நல்ல வரவேற்பை பெற்ற நிலையில், படத்தின் பெயரை புது டைட்டில் ஃபான்டுடன் வரும் 20ம் தேதி ரிலீஸ் செய்ய இருக்கிறார்கள். இவரது இயக்கத்தில் உருவாகியிருக்கும் 'துருவ நட்சத்திரம்' படத்தின் போஸ்ட் புரொடக்‌ஷன் பணிகளும் நடைபெற்று வருகிறது. 

கமல்ஹாசனின் 'விஸ்வரூபம் 2' படம், வரும் ஆகஸ்ட் 10-ம் தேதி வெளியாக இருக்கிறது. இந்நிலையில் இந்தி  சோனி தொலைக்காட்சியில் சல்மான் கான் தொகுத்து வழங்கும் விளையாட்டு நிகழ்ச்சியில், கமல், பூஜா குமாருடன் இணைந்து பங்கேற்றுள்ளார். மும்பையில் நடந்த இந்த நிகழ்ச்சியில் எடுக்கப்பட்ட புகைப்படம் வைரலாக ஷேர் செய்யப்பட்டுவருகிறது.

தெலுங்கில் சிரஞ்சீவி நயன்தாரா நடித்துவரும் படம் சயீரா நரசிம்ம ரெட்டி. இந்தி, தமிழ், தெலுங்கு ஆகிய மொழிகளின் முன்னணி நடிகர்கள் நடிக்கும் இந்தப் படத்தில் விஜய் சேதுபதியும் நடிக்க உள்ளார். இந்நிலையில் அவர் இப்படத்தில் தமிழ் பேசும் மன்னர் கதாபாத்திரத்தில் நடிக்க உள்ளார் என்ற தகவல் வெளியாகியுள்ளது!

ஜெயம் படம் மூலம் தமிழில் அறிமுகமாகிப் பிரபலமான நடிகை சதா, பின்னர் வாய்ப்பு இல்லாமல் நடிப்பிலிருந்து ஒதுங்கி இருந்தார். இந்நிலையில், மஜீத் இயக்கும் புதிய படத்தில் நடிக்க உள்ளார். `டார்ச்லைட்' எனப் பெயரிடப்பட்டுள்ள இந்தப் படத்தில் சதா, நெடுஞ்சாலைகளில் பாலியல் தொழிலில் ஈடுபடும் கதாபாத்திரத்தில் நடிக்கிறார்.

விவசாயத்தை மையமாக வைத்து எடுக்கப்பட்டுள்ள `கடைக்குட்டி சிங்கம்' படம் தெலுங்கில் `சின்ன பாபு' என்ற பெயரில் வெளியானது. இப்படத்தைப் பார்த்த துணை ஜனாதிபதி வெங்கைய நாயுடு, `கிராமத்துப் பசுமைப் பின்னணியில், நம் பழக்க வழக்கங்களை, மரபுகளை மற்றும் வாழ்க்கை முறையை, ஆபாசம் இல்லாமல் காட்டிய சுவாரஸ்யமான நல்ல படம்’ என்று தெரிவித்தார்.

கார்த்திக் சுப்பராஜ் ரஜினியை வைத்து இயக்கும் படத்தில் விஜய்சேதுபதியும் பாபி சிம்ஹாவும் ஏற்கெனவே இணைந்த நிலையில் தற்போது அஞ்சலியும் இணைய உள்ளார். இறைவி படத்தில் இவர்கள் மூன்று பேரின் நடிப்பு அனைவராலும் பாராட்டப்பட்டது குறிப்பிடத்தக்கது.

பாலா இயக்கி தமிழில் வெளியான படம் நாச்சியார். ஜோதிகா, ஜி.வி.பிரகாஷ் நடித்த இப்படம் தமிழில் வெற்றி அடைந்தது. இதையடுத்து இப்படம் தெலுங்கில் டப் செய்து வெளியிடும் பணி நடந்துவருகிறது. தெலுங்கில் இப்படம் 'ஜான்சி' என்ற பெயரில் வெளிவரப்போவதாகக் கூறப்படுகிறது.

10.142.15.192