Sports


கொரோனா காரணமாக இந்த ஆண்டு ஆஸ்திரேலியாவில் நடைபெற இருந்த டி20 உலகக்கோப்பை தொடர் அடுத்த ஆண்டு நடைபெறும் என கடந்த மாதம் ஐசிசி தெரிவித்திருந்தது. இந்த நிலையில் 2021 -ம் ஆண்டு டி20 உலகக் கோப்பை தொடர் இந்தியாவில் நடைபெறும் எனவும் 2022 -ம் ஆண்டு டி20 உலகக் கோப்பை கிரிக்கெட் தொடர் ஆஸ்திரேலியாவில் நடைபெறும் எனவும் ஐசிசி தெரிவித்துள்ளது.

 

பாகிஸ்தான் கிரிக்கெட் அணி வீரரான சாகித் அப்ரிடி, ``கேப்டனாக இருப்பதில் ஆஸ்திரேலிய அணியின் முன்னாள் கேப்டன் பாண்டிங்கை விட இந்திய அணியின் முன்னாள் கேப்டன் மகேந்திர சிங் தோனியே சிறந்தவர் என நினைக்கிறேன்” என்று தெரிவித்துள்ளார்.

வெஸ்ட் இண்டீஸ் அணிக்கு எதிரான ஆட்டத்தில் இங்கிலாந்தின் பிராட் 500 டெஸ்ட் விக்கெட்டுகள் என்ற இலக்கை அடைந்தார். முத்தையா முரளிதரன், வார்னே, கும்ப்ளே, ஆண்டர்சன், மெக்கரத், வால்ஷ் ஆகியோருக்கு பிறகு 7 -வது வீரராக 500 டெஸ்ட்  போட்டிகள் விக்கெட்டுகள் வீழ்த்திய வீரர் என்ற பெருமையை பெறுகிறார் பிராட்!

ஐபிஎல் போட்டிகள் ஐக்கிய அரபு அமீரகத்தில் வரும் செப்டம்பர் 19-ல் தொடங்கும் என்று அறிவிக்கப்பட்டுள்ளது. இதுகுறித்து பேசிய ஐபிஎல் தலைவர் பிரிஜேஷ் படேல், ``செப்டம்பர் 19ல் தொடங்கும் ஐபிஎல் தொடரின் இறுதிப்போட்டி நவம்பர் 8ம் தேதி நடத்தத் திட்டமிடப்பட்டுள்ளது’’ என்று தெரிவித்தார். 

முன்னாள் கிரிக்கெட் வீரர் சுனில் கவாஸ்கர் தனது 71-வது பிறந்தநாளில் பிறவி இதயநோய்களால் பாதிக்கப்பட்ட 35 குழந்தைகளின் அறுவை சிகிச்சைக்கு ஸ்பான்சர் செய்யவிருக்கிறார். தான் அடித்த சென்ஞ்சுரிகளின் எண்ணிக்கை 35 என்பதை நினைவுகூறும் வகையில்,  ஓவ்வோர் ஆண்டும் 35 குழந்தைகளுக்கு உதவி வருகிறார். `நம்பிக்கையிழந்தும் விரக்தியிலும் வாழும் குழந்தைகளுக்கு ஆரோக்கியமான வாழ்க்கையை மீட்டெடுக்கும் முயற்சி; என்று நெகிழ்கிறார்.

`எங்கள் வீட்டில் உணவை அளந்துதான் சாப்பிடுகிறோம்’ என்கிற பாலிவுட் நடிகை அனுஷ்கா ஷர்மா, அதற்கு கலகல ஆதாரமாக ஒரு புகைப்படத்தையும் இன்ஸ்டாவில் பகிர்ந்திருக்கிறார். அதில் 100 கிராம் அவல் உப்புமாவை வெயிங் ஸ்கேலில் அளந்து கொண்டிருக்கிறார் விராட் கோலி. `இதற்காகவே கிச்சனில் ஒரு வெயிங் ஸ்கேல் வைத்திருக்கிறார் விராட்’ என்று ஹார்ட்டின் எமோஜி விட்டு ரசித்திருக்கிறார் அனுஷ்கா ஷர்மா. 

தோனிக்கு,  மனைவி சாக்‌ஷி தன் இன்ஸ்டா பக்கத்தில் அழகான பிறந்தநாள் வாழ்த்து ஒன்றைப் பதிவிட்டுள்ளார். அதில், `நீங்கள் பிறந்து இன்றுடன் மற்றொரு வருடம் முடிந்துவிட்டது. இனி நீங்கள் மேலும் கொஞ்சம் புத்திசாலியாகவும், இனிமையாகவும் மாறுங்கள். எந்த விஷயத்தாலும் அசைக்க முடியாத ஒரு மனிதர் நீங்கள். வாழ்க்கையின் மற்றோர் ஆண்டைக் கொண்டாடுவோம். பிறந்தநாள் வாழ்த்துகள், கணவரே.." என்று தன் காதலைப் பகிர்ந்துள்ளார்.

கடந்த 50 ஆண்டுகளில் சிறந்த பேட்ஸ்மேன் யார் என்ற கருத்துக் கணிப்பை விஸ்டன் இதழ் நடத்தியது. 11,400 ரசிகர்கள் கலந்துகொண்ட இந்த கருத்துக் கணிப்பில் இந்தியாவின் ராகுல் டிராவிட் 52% வாக்குகளுடன் முதலிடம் பிடித்தார். 48% சதவிகித வாக்குகளுடன் சச்சின் 2-வது இடத்தைப் பிடித்தார். சுனில் கவாஸ்கர் 3-வது இடத்தைப் பெற்றார்.

பாகிஸ்தான் கிரிக்கெட் அணி  வீரர்கள் 10 பேருக்கு கொரோனா பாதிப்பு உறுதி செய்யப்பட்டுள்ளது. முகமது ஹபீஸ், ஃபகர் ஜமான, வஹாப் ரியாஸ், சதாப் கான் உள்ளிட்ட முன்னணி வீரர்கள் பாதிக்கப்பட்டுள்ள நிலையில், அவர்கள் தனிமைப்படுத்தப்பட்டுள்ளனர். அதேநேரம் திட்டமிட்டபடி பாகிஸ்தான் அணி, இங்கிலாந்து செல்லும் என அறிவிக்கப்பட்டிருக்கிறது.

 

கொரோனா அதிகரித்து வரும் சூழலில் பொறுமையுடன் காத்திருக்க வேண்டியதுதான் முக்கியமானது என டிராவிட் கூறியிருக்கிறார். மேலும், `தேசிய கிரிக்கெட் அகாடமியில் பயிற்சி தொடங்கப்பட்டால் உள்ளூர் வீரர்களுக்கு முதலில் அனுமதி வழங்கப்படும். பிற பகுதிகளில் இருந்து வரும் வீரர்கள் 14 நாள்கள் தனிமைப்படுத்திக் கொள்ள வேண்டும்’ என்றார். 

வெஸ்ட் இண்டீஸ் அணிக்கெதிரான 3 போட்டிகள் கொண்ட டெஸ்ட் தொடரை ரசிகர் இல்லாத மைதானங்களில் நடத்த இங்கிலாந்து கிரிக்கெட் வாரியம் திட்டமிட்டிருக்கிறது. முதல் டெஸ்ட் போட்டி ஜூலை 8-12 தேதிகளில் சௌதாம்படனில் தொடங்குகிறது.  இந்தத் தொடரில் பங்குபெறும் வீரர்கள் அனைவரும் பாதுகாப்பான சூழலில் மைதானத்துக்குள்ளேயே இருக்கும் விடுதிகளில் தங்கவைக்கப்பட இருப்பதாகவும் கூறப்பட்டுள்ளது.

அமெரிக்காவில் கருப்பினத்தை சேர்ந்த  இளைஞர் உயிரிழந்த விவகாரத்தில், ஒரு சிறுமி கருப்பின மக்களுக்கு நேரும் துயரம் பற்றி வீடியோவில் பேசியுள்ளார். அதை ஷேர் செய்துள்ள டென்னிஸ் வீராங்கனை ஷெரினா வில்லியம்ஸ்,  ‘அவர் எனக்கான வார்த்தைகளை கண்டிபிடித்துள்ளார். இதில் மோசமான விஷயம் என்னவென்றால் இப்படி நடப்பது ஒன்றும் புதிதல்ல’ என ட்விட்டரில் குறிப்பிட்டுள்ளார்.

அஷ்வினுடனான உரையாடலின்போது பேசிய விராட் கோலி, 2012 ஆசிய கோப்பைத் தொடரில் பாகிஸ்தானுக்கு எதிரான போட்டி நினைவலைகளைப் பகிர்ந்தார். தானும் ரோஹித்தும் இடித்துக்கொண்டதால் ஒரு ரன் எடுக்க வேண்டிய இடத்தில் பாகிஸ்தான் பேட்ஸ்மேன்கள் 3 ரன்கள் எடுத்ததாகவும் இதனால், தோனி தம் மீது அதிருப்தியை வெளிப்படுத்தியதாகவும் கோலி நினைவுகூர்ந்தார். 

ரோஹித் சர்மா, ஷிகர் தவன், இஷாந்த் சர்மா மற்றும் பெண்கள் அணியின் தீப்தி சர்மா ஆகியோர் பெயர்களை பி.சி.சி.ஐ நாட்டின் உயரிய விளையாட்டுத்துறை விருதுகளுக்கு பரிந்துரை செய்துள்ளது. ரோஹித் சர்மாவை ராஜீவ்காந்தி கேல் ரத்னா விருதுக்காகவும், இஷாந்த் சர்மா, ஷிகர் தவன் மற்றும் தீப்தி சர்மா ஆகியோர்களை அர்ஜுனா விருதுக்காகவும் பிசிசிஐ பரிந்துரை செய்துள்ளது.

தோனி ஏதாவது ஒருவகை கிரிக்கெட்டில் தொடர்ந்து விளையாடி வரும் சூழலில் அவரால் 2023ம் ஆண்டு உலகக் கோப்பையிலும் விளையாட முடியும் என்று நம்பிக்கை தெரிவித்திருக்கிறார் இங்கிலாந்து அணியின் முன்னாள் சுழற்பந்து வீச்சாளர் மாண்டி பனேசர். `சென்னை சூப்பர் கிங்ஸ் கேப்டனாக அவர் இருப்பது அந்தத் தொடரை ரசிகர்கள் தொடர்ந்து பார்ப்பதற்கான ஒரு முக்கியக் காரணம்’ என்றும் தெரிவித்திருக்கிறார்.

கொரோனா நேரத்திலும் இங்கிலாந்து மற்றும் தென்னாப்பிரிக்கக் கிரிக்கெட் வாரியங்கள் கிரிக்கெட் போட்டிகளைத் தொடங்கத் திட்டமிட்டிருக்கின்றன. ‘ `வீரர்களைத் தனிமைப்படுத்தப்பட்ட சூழலில் வைத்து கிரிக்கெட் தொடர்களை நடத்துவது குறித்து இங்கிலாந்து கிரிக்கெட் வாரியம் முன்வைத்துள்ள யோசனை நடைமுறைக்கு ஒத்துவராது’ என ட்ராவிட் தெரிவித்துள்ளார்.

1971-ம் ஆண்டு நடந்த உலகக் கோப்பை போட்டியின் அரையிறுதியில் நாங்கள் பாகிஸ்தானிடம் தோல்வியடைந்தோம். அப்போது அணியின் மேலாளராக இருந்த பல்பீர் சிங், அறைக்கு வந்து குழந்தைபோல் சண்டைபோட்டார். பிறகு மாலை தன் அறையில் அழுதுக்கொண்டிருந்தார்’ என்று பல்பீர்சிங் பற்றி பகிர்ந்துள்ளார் ஹாக்கி வீரர் தயான் சந்தின் மகன் அசோக் குமார்.

இந்திய அணியின் முன்னாள் கேப்டன் தோனி குறித்து பேசிய ரெய்னா, ``எல்லா ஆட்டத்திலும் அவர் ஒரு ஸ்டெப் முன்னாடி தான் இருப்பார். ஸ்டெம்புக்கு பின்னால் நிற்பதால் பிட்சின் தன்மை குறித்து நன்றாக அறிந்து வைத்திருப்பார். ஐ.பி.எல் தொடரில் நான் குஜராத் அணிக்கு கேப்டனான போது, `என்னிடம் எப்போதும் போல் யோசனைகள் கேட்கலாம்’ என்றார். அவர் கடவுளின் கிப்ட்" என்று கூறியுள்ளார். 

கோவிட் 19 பிரச்னைக்குப் பிறகு ஐசிசிக்கு வலிமையான தலைமை தேவை. கிரிக்கெட் வீரரான கங்குலி போன்ற ஒருவர் ஐசிசியின் தலைமைப் பொறுப்புக்கு வருவது சிறப்பானது. கிரிக்கெட்டுக்கு அது நன்மை பயக்கும். கிரிக்கெட்டில் மதிப்புமிக்க அவரால், அதைச் சிறப்பாகப் புரிந்துகொண்டு இயங்க இயலும்’ என தென்னாப்பிரிக்க கிரிக்கெட் வாரிய இயக்குநர் கிரேம் ஸ்மித் தெரிவித்துள்ளார்.

`சச்சின்.. டிராவிட் குறித்து நாம் பேசினால் கோலி, ரோஹித், ரஹானே, புஜாரா ஆகியோர் ஓரளவுக்கு அந்த இடத்தை நிரப்பிவிட்டார்கள். நீங்கள் தோனியை ஓரங்கட்ட நினைக்கிறீர்கள். ஆனால், தோனியின் இடத்தை நிரப்புவதற்கு இங்கு யாரும் இல்லை. அவர் இன்னும் ஃபிட்டாகத்தான் இருக்கிறார்’ என இந்திய அணியின் முன்னாள் வீரர் முகமது கைஃப் கூறியுள்ளார். 

கொரோனா அச்சுறுத்தல் காரணமாக பந்துவீச்சாளர்கள் பந்தை ஷைன் செய்வதற்கு எச்சிலைப் பயன்படுத்த தடை விதிக்க ஐசிசியின் ஆலோசனைக் குழு பரிந்துரைந்துள்ளது. இப்படி செய்தால் பந்துவீச்சின் சுவாரஸ்யம் குறைந்துவிடும். இது ரசிகர்களுக்குக் கொண்டாட்டத்தைக் கொடுக்காது. எனவே இதற்கான மாற்று ஏற்பாட்டை ஐசிசி பரிந்துரைக்க வேண்டும் எனவும் கம்பீர் கேட்டுக்கொண்டுள்ளார். 

பந்தை கிரிக்கெட் பேட்டின் நுனியில் மிக லாகவமாகத் தட்டும் சவாலை,  யுவராஜ் சிங் சச்சினுக்கு அளித்தார். அதை வித்தியாசமாக செய்து முடித்த சச்சின் மீண்டும் அதை யுவராஜ் செய்ய வேண்டும் என சவால் விடுத்திருந்தார். `நான் இந்த ஜாம்பவானிடம் தவறாக சவால் விட்டுவிட்டேன். இதை செய்வதற்கு எனக்கு ஒரு வாரம் ஆகலாம்’ என யுவராஜ் சிங் பதில் அளித்துள்ளார்.

காஷ்மீர் விவகாரத்தில் இந்தியா குறித்து அஃப்ரிடி கூறிய கருத்துகள் பெரும் சர்ச்சையாகியுள்ளது. இதற்கு  ஹர்பஜன் சிங் கடும் கண்டனம் தெரிவித்திருக்கிறார். `மனிதாபிமான அடிப்படையில் கொரோனாவால் பாதிக்கப்பட்ட மக்களுக்கு உதவும் நோக்கில் அஃப்ரிடியின் தொண்டு நிறுவனத்துக்காக  குரல்கொடுத்தோம். இனிமேல் அஃப்ரிடியுடன் எந்தத் தொடர்பும் இல்லை’ என கூறியுள்ளார்.

கொரோனா பரவல் காரணமாக உலகளவில் பல்வேறு விளையாட்டு போட்டிகள் ஒத்தி வைக்கப்பட்டுள்ளன. இந்நிலையில், இந்தாண்டு நடைபெறுவதாக அறிவிக்கப்பட்ட டி20 உலகக் கோப்பை போட்டிகளை அடுத்தாண்டு ஒத்தி வைக்க ஐ.சி.சி நிர்வாகக் குழு ஆலோசனை நடத்தத் திட்டமிடப்பட்டுள்ளதாக தகவல்கள் தெரிவிக்கின்றன. 

இந்திய கிரிக்கெட் வீரர்கள் பும்ரா, ஷிகர் தவன் ஆகியோரின் பெயர்களை அர்ஜுனா விருதுக்குப் பரிந்துரை செய்ய பிசிசிஐ முடிவு செய்துள்ளதாகத் தகவல்கள் வெளியாகியுள்ளன.

TamilFlashNews.com
Open App